Lubij leži centralnje w třiróžku Němska – Čěska – Pólska a je znajmjeńša geografisce srjedźišćo Hornjeje Łužicy. Z přestrjenju 78,74 km² liči Lubij k najwjetšim městam Wuchodosakskeje a wabi ze swojim wobhladanja hódnym nutřkownym městom.

Wosebitosće 

Zwjazk šěsćiměstow

Dnja 21. awgusta 1346 zjednoćichu so města Budyšin, Zhorjelc, Žitawa, Kamjenc, Lubań a Lubij k škitnemu a wobornemu zwjazkej, zwjazkej šěsćiměstow. Tutón wowliwowaše rozsudnje stawizny regiona přez lětstotki. Lubij měješe swojeho centralneho połoženja dla wosebity wuznam, dokelž so tu lětne zhromadźizny (konwenty) wotměwachu.

1815 zwjazk šěsćiměstow rozpadny. To bě wuskutk Wienskeho kongresa, po kotrymž Zhorjelc a Lubań Pruskej připadnyštej a druhe štyri města w Sakskej zwostachu. K 770-lětnemu wobstaću města Lubija, dnja 21. junija 1991, bu zwjazk znowa wožiwjeny. Prěnje posedźenje zwjazka městow wotmě so, kaž něhdy wšitke posedźenja, w konwentnej rumnosći radnicy města Lubija. Dźensa organizuje tuta institucija zhromadne iniciatiwy, předewšěm we wobłukach wuměłstwo, kultura, sport a turistika, zo by so atraktiwnosć regiona zwyšiła.

Zajimawostki

Wěža krala Friedricha Augusta, kotruž Lubijčenjo zwjetša jenož “Gusseisen Turm” mjenuja, je atrakcija města. Twarił bě ju pjekarski mištr Friedrich Awgust Brettschneider na wjeršku Lubijskeje hory, je 28 m wysoka a waži někak 70 tonow. Hladajo na twarsku konstrukcij z lateho železa z něhdźe tysac jednotliwych dźělow płaći jako jónkróćna w Europje. 1993/94 přewjedźe so zakładne saněrowanje, za to bu wěža roztwarjena a znowa natwarjena.

Schminkec dom abo Scharoun - wila, dalša zajimawostka města, bu mjez 1930 a 1933 wot sławneho Hansa Scharouna za Fritza & Charlotu Schminke planowana a słuša do najwuznamnišich twarow klasiskeje moderny. Tohodla podadźa so přeco zaso fachowcy na ekskursiju do Lubija a wobhladaja sej wilu, kotraž bu w njeličomnych wozjewjenjach wopisana. Fachowje zajimowani móža we wili přenocować a uniwersity a wysoke šule móža ju za workshopy a seminary wužiwać.

Dalše impresije dóstanjeće na hompage www.loebaufoto.de.